صعب قوى الكلام

هيه دى مصر .. هيه دى ام الدنيا .. لأ مش ممكن تكون دى مصر بتاعتى .. صعب قوى انى اصدق ان دى بلدى
اللى شفته فى الكام شهر اللى فاتوا ما يتوصفش
اللى قريته و اللى سمعته صعب قوى على اى حد انه يصدقه
سرقة و فساد .. فقر و بؤس .. تعذيب و اضطهاد .. قتل و تشويه .. تلوث و أمراض

معقول حال بلدى بقى كده
معقول مصر بقت بالشكل ده
صعب قوى انى اصدق .. صعب قوى انى انسى كل الشعارات اللى حفظتها و انا صغير
مصر أم الدنيا و أحلى بلاد الدنيا مصر و مصر الحضارة و مصر العراقة
صعب قوى

أكيد مصر فيها حاجات حلوة كتير .. و الا ما كنتش حبيتها الحب ده كله
بس اللى مايشوفش السلبيات الرهيبة فى مصر يبقى أعور

..........

و أنا كنت أعور
لحد ما شفت بعينى التانية اللى ما كنتش عايز اشوفه
اللى شفته بعينى التانية كان صعب لدرجة انى بحلقت بعينيى الاتنين و مش مصدق

..........

انا طول عمرى بحب البلد دى و بموت فى ترابها و هافضل احبها لحد ما اموت
جايز يكون كلامى فيه شعارات بس هيه دى الحقيقة و الحقيقة كمان ان احنا مش بنعبر عن حبنا للبلد دى بالشكل المطلوب
انا فعلا عشقى للبلد دى مالوش حدود .. بس اللى شفته كان فظيع
انا طول عمرى لو حد قال نص كلمة عن مصر اتحمقلها قوى و ازعل قوى .. و دايما كنت بقول انه مش دى مصر الحقيقية و ان السلبيات دى حاجات عرضية وان مصر اجمل من كده وكل الكلام ده تهويل لحاجات تافهة

كنت بقول كده حتى لما كنت اقرا فى الجرايد عن المشاكل و الفضايح و الكوارث حتى .. كنت بقول ان كل ده تهويل اعلامى
و فضلت اقول كده لحد ما الموضوع وصل ابعاد خيالية و فعلا بقى مش هاتقدر تغمض عينيك
فضلت اقول كده لحد ما شفت بعينى ما حدش قاللى

الكلام صعب قوى .. بس اللى انا شفته اصعب
اى حد بيحب البلد دى لازم يبقى حاسس الكلام ده و بيتعذب بيه زيى

مش قادر اقول اكتر من كده .. صعب قوى الكلام